الدنيا تقلبت على الأمن الموازي وهوما بيدهم إلي طلب مجلس موازي…بقلم ياسين العياري

الدنيا تقلبت على الأمن الموازي وهوما بيدهم إلي طلب مجلس موازي...بقلم ياسين العياري

الدنيا تقلبت على الأمن الموازي!
ما لاحظ حد إنه أغلب من قلبو الدنيا على الأمن الموازي، هوما بيدهم إلي عياو يطبلو و يزكرو للمجلس الموازي متع مرزوق! الي مشكلتهم موش الدولة و مؤسساتها : الكله تفليم!
مشكلتنا الي ناقصنا وعي طبقي!
تره ما لحظتوش الي هوما بيدهم متع الأمن و الأمان، إلي أيامات الثورة يحكيو بالإستقرار و بالعصابات الملثمة، هوما بيدهم الي ما تحركو كان نهار 14 (علاه 14؟ نهار 12 ما فماش موتة؟ نهار 10 ما فماش كرطوش؟! فقط نهار 14 خاطر بخطاب فهمتكم بن علي أعلن هزيمته ياخي جاو مع الرابح)، هوما بيدهم متع القبة، هوما بيدهم متع التلحيس و مسيرات سيب الحكومة تخدم على روحها لما كانت طبقتهم تحكم، هوما بيدهم الي قالو على شباب القصبة شلوح و عربان و بزقليف، هوما بيدهم متع أضرب يا بوليس و لا لصناع الفتن (مادام طبقتهم هي الي تحكم وقتها بلعيد يصنع في الفتنة بالنسبة ليهم و حمة الهمامي يحب يدخل البلاد في حيط و إتحاد الشغل منظمة إرهابية) هوما بيدهم متع المجلس الموازي متع مرزوق و هوما بيدهم الي اليوم معادش مع الموازي؟ و الي أغلبهم تقريبا من طبقة وحدة؟!
واهم إلي تجد عليه لوغة حداثة و ظلاميين و ريق : الصراع صراع طبقي بالأساس
لواه موش عاجبتهم الأمن الموازي؟ و هوما الي طبلو للمجلس الموازي؟ و هوما الي ما قلقهمش كيف غاب الأمن و عسولهم أولاد الحوم على الفيلات متاعهم؟
علاه مقلقهم رغم إنه قانونا و منطقا من حق أي مواطن إنه يدافع عن ممتلكاته! علاه في بريطانيا كي تلقى واحد يخرب و تمنعه : يعديوك تبحث : لواه تمنع فيه كارك خليته و شبيك عامل أمن موازي؟
هبلو خاطر السلفية فهمو اللعبة و كانت عندهم قرائة صحيحة للأحداث، و الفيديو الي هبطتها الوطنية دز على غلطة هي أكبر دليل : كانو ناوين يحرقو البلاد و يقدمو السلفية قربان و يعملو فيلم على العنف زعمة الديني، مع مشاعر مجيشة وقتها تجي قدقد : كيف خرجو السلفية و فهمو اللعبة ما تحرقتش البلاد ما لقاو ما يبيعو لفرنس 24، هانهم ولاو عملو فيلم أمن موازي
الطبقة هذيكا طبقة جبانة بالأساس! غير قادرة على التضحية، على الصدام، طبقة تشوف التفليم على الفايسبوك : سنصمد، سنقاتل، الكلنا شهداء و هاك الريق، وقت الصح : نفسي نفسي
خطر الطبقة هاذي شنوة؟ عندها سلاح فتاك : الوهابية ، نسبة إلى أتباع عبد الوهاب عبد الله : تجيش تتلاعب تكذب تحبط المواطن البسيط، الزوالي، البطال،الشهار، الي قادر على التضحية و الصدام، تغسلو مخه و تجد عليه و تلقاه يقوم بحرب بالنيابة لفائدة طبقة أخرى : هاو حداثة، هاو إقتصاد، هاو زمارة باش المواطن البسيط الي ما عندوش وعي طبقي يحط صبعو في عينو و يحارب عن جهل على مصالحهم هوما و يجيبلهم السلطة تحت ساقيهم منغير ما ياخذو هوما حتى ريسك!
واهم من يظن أنه مساندة المجلس و إنه الطريق الوحيد للحكم هو الصندوق يدعم في النهضة! الحرب طبقية موش حزبية! بين الي يحب الحكم يكون بيد الشعب يختار و ينحي إش يحب و بين الي يحب الحكم بيد مجالس الحكماء و الأعيان و الخبراء و الي تحب : إختلفت الأسماء و الحكاية هي هي
النهضة خانت طبقيا الي إنتخبوها! لا أشفات غليلهم و حاسبت، لا فكت فلوس السراق و وزعتها، و جابهت الي إنتخبوها بالرش ليرضى عنها أيتام عبد الوهاب عبد الله و أصحاب المال و الجاه و الحل و الربط : هي تستحق سخط الطبقات الشعبية
لكن الصراع أعمق : إبقاء السلطة في يد الشعب : يعزل و يولي أو فكان السلطة متع الشعب بإستعمال الشعب
المفروض إنه الجبهة الشعبية تكون أول وحدة تنبه لطبقية الصراع : لكن الجبهة سبقت الإديولوجي على الطبقي و ما نجمتش تاخذ إمتداد شعبي كافي لتجمدها في شعارات تعكس واقع عمال 1917 موش واقع شهارة 2013 و لعدم إدراكها أن الهوية هي في مركز الصراع الطبقي هذا مع إدعائها إمتلاك الحقيقة المطلقة
طولت و بش نلخص : فمة طبقة ديما تحكم، عمرها الكل تحكم، و إنت بالنسبة ليها وبش، عربان، بزقليف، تستعمل في الإعلام باش إنت تمشي في بلاصتها تاكل اللاكريمو و الكرطوش و تجوع و تتمرمد و تفك لروحك السلطة و تعطيهالها و إنت شايخ فرحان! خرافات كفائة و إقتصاد و حريات و مرأة و تعبير : حاجات عمرها ما همتهم و ل 50 عام ساهمو في قمعا، فقط حرابش باش إنت تجد عليك
في الختام، عملت دورة في الفايسبوك، نلقى برشة م الطبقة الي حكيت عليها عاملين أعياد حب للشهداء : وقت السبسي من طبقتهم يحكم كي تحكي على الشهداء تولي ثورجي و إش مزالو يحبو ماهم خذاو عشرين مليون! توة يفلمو و هوما نحلف عليهم لا واحد قادر يعطيني أسامي خمسة شهداء.
نهاركم طيب

 

http://al-sada.net/?p=6894