المصدر الأمني الشريف : زياد الهاني و سفيان بن فرحات نموذجا ..بقلم :مروان حمدي

سفيان بن فرحات متاع شمس أف.أم بزهر نهار 2 فيفري قابل بالصدفة واحد أمني يخدم في الداخلية الكبيرة تي هذيكا متاع شارع بورقيبة طلع خو صاحبو إلي قرا معاه في الجامعة وقالوا يا سي سفيان راهو النهضة باش تقتل ناس و أنا باش نقطع من البلاد بربي وصل للشعب هالحكاية خاطر عندي فيك الثقة … سيدي سفيان صحافي كبير ولامع ومناضل نشر الحكاية وبلغ الشعب اما وقتاش بعد ما مات سي شكري …. خسارة…
أيا يا سيدي في نهار الجنازة سيدي زياد الهاني وهو صحافي وطني ومحايد وفي نقابة كان يقوم بالعمل الصحفي متاعو ويتظاهر في شارع بورقيبة قدام الداخلية جاه أمني من الشرفاء كالعادة وقالو يا سيدي زياد بربي حرك روحوك و ساعدنا نطيحوا الحكومة… علاش يا سيدي الامني الشريف… على خاطر واحد من العروفات متاعنا هو إلي قتل بلعيد وراهو من تالة النهضة بالامارة ولد اللوز هو إلي جابو وعامل جمعية وسط الجمعية و مدرب ناس يجي عشرين حتى نحن ما نعرفهومش وإلي صار عملتهم. سيدي زياد كي شاف الدمع يترقرق من عيني الامني الشريف صدقوا بالطبيعة رغم إلي اليوم باش شافوا وعرفوا وصب الصبة من دون ذكر اسماء بالطبيعة حماية للسر المهني. بصراحة الحمد لله على حرية الصحافة في تونس كل شي بالمكشوف وعلني اما الزح شبيها المصادر الكل امنية شريفة …

http://al-sada.net/?p=5910